Si holit Mangging

Sai dilului si Jamordong do akkal mambuat hepeng ni oppungna, Oppu Jamordong, na tarbarita haholitonna. Dibaen to hepengna tu sitabunianna mansai buni, di hohosnya do disolothon deba, dungi di tahulukna–pecina, di sipatuna, nang di naso taripe. Bobosan do rohana molo ditabunihon di bilut, atik disigati OppuJamordong boru, iaso i atik dilului si Jamordong.

Tarbarita do haholiton ni OppuJamordong on disude nasahuta, haru tu pahompuna nga mangholit, lam tu halak, hombar balokna ma?. Nga pangholit, parakkal muse. Huroa martinodohon do parangkal tu pangholit. Molo dijalo ibana sagalas kopi manang tes manis di Laponi OppuPardomuan, sai torus do hurang gula dohononn ni on. “Ai tambai hamu jo ito, gulanai, lango-lango dang mardai” ninna.

Dung ditambai oppuPardomuan boru gulo, tu galas panginumanna, mekkel suping ma ibana. Dibuat ma sendok tes, dungi di ordong ma nanget situtu, tung nangeeeeeeeeeet situtu, jala holan diginjang do diordong, asa unang malala gulo i ditoru.

Dung sajom nai annon, didok ibana ma muse. “Tambai hamu jo ito aek las i” ninna. Burju rohani parlapo, ba, diambai. Ai somal do songoni dilapo i, jala datung dietong na marakkal akka panuhor i. Dung ditambai aek las i, ipe asa diordong gogo. Gabe sai hira na gabe dua hali ma ibana mangopi.

Songoni do molo diontang hobar jabu, molo masa ulaon dihuta i, dibuat do pingganna na bolak. Dungi disonduk ma indahan antar ummotik, otik situtu. “Ai godang buat hamu Lae” ninna sahalak.

“Daong lae, ipe mangan sian jabu” ninna mangalusi. Dungi dibuat ibana ma muse loppanna tolu ponggol. Dang sadia leleng, suda ma indahan alai adong dope loppan na taboi. Dungi didok ma “Bah, langlang nai bah, tambai jo ito indahan i, asa adong laok ni ikkan on” ninna. Ujungna dilean ma partambuan tu jolona. Diuhalma indahon on godang, alai dang dohot loppan diambai ibana.

Tep, habis ma loppan on

Ninna ma muse, “Gabe holan indahan on niallang ateh, hurang tabo do” ninna hut dihidop amanta nadilambungna asa di pajonok inganan partambuan ni juhut i. Songoni ma satorusna sahat tu nabutong, martambu indahan martambu loppan.

Ima akkalna.

Manogotna, dilului si Jamordong ma akkal. Dungi lao ma ibana tu pamispisan ni lapo ni OppuPardomuan ondeng. Diputihi ma kartu LENG napinambolongkon ni parleng nabodari. Dapotsa ma opat BENTO. Mulak ma tu jabu. Didokma “Oppung, Hepengna” ninna hut dipatudu sada bento
“Nion” ninna oppuJamordong
Tep satonga jomnai
“Oppung, Bento!” ninna, dipatudu muse
“Nion,” ninna oppuJamordong, dungi dilean parribuan dua

Satonga jom nai muse.
“Pung, Hepengna muse” ninna hut didabuhon Bento i.
“Bah, ai piga bentom?, nga didabu ho dua, hape dabuonmu dope, nga mosok i kartumi ” ninna mangalusi

**Hasomalan ni OppuJamordong ima marbento, ganup ari ganup tikki”