Maniram

Huida godang na “galau” di botari on, lumobi angka doli-doli nang namarbaju naso “jelas” sitatus ni pardonganonna. Didok adong halletna, hape malam minggu songon on, sai mangenop do dijabu. Lalap holan na marpokker iasoi margitar dijolo jabu i, endena pe angka panolsolion. Alai, unang pola marsak hamu angka dongan, di facebook on ma hita markombur. Hubaen pe nonang sian on, ateh. Lumobi ma tu Laekku Hematov Bosrin Purba na ngali-ngalian di kota namohopon. Ninna karejo halletna, alai dang haru binoto i, atik naso lakku do lae on. Atik naung doli-doli saurmatua do naeng. Ai marjanji au nantoari patolhashon sada suhutan. Nauli ma i, hugarar pe utang hi ateh.

Alai dang holan lae on na “galau” diborngin on, nang dongan ama pe huida godang mar-galauan, naso didok be do. Adong ma galau ala dang adong donganna mar-liat-liatan manjaha harotas na metmet, adong muse ma on na galau ala dang marhepeng.

Ai na manonton tipi do hami nadua dohot NaiPartogi tolu ari na salpu, sibotari songonon. Antusi hamu ma na pengantin baru on, marbulanmadu ma torus. Dang apala olo hami manonton na maol pingkiran, politik, sinetron, lumobi ma mamereng bencong marende di tipi i. Ai gabe hira akka na beccong do huida namarende i. Aha namasa diKorea, i ditiru jolma i.

Tinonduran ma Indonesian Idol, ba gabe loakon huhilala. Sude gabe parbolat-bolatan. Dang halak Indonesia be namarende i, nga gabe halak jawa, menado, maluku, halak sunda, halak batak, nang na asing. Ta bereng ma, mangido SMS ninna alai sai dipatuduhon parbolat-bolatan. Martanding luat. Ima jo i.

Disada tipi, acara na geok-geok, mengkel martata ma au gogo.

“Boasa mengkel ho papa?” ninna NaiPartogi
“Geok,” ningku mangalusi
Dungi rap mambege ma hami nadua, tutu ma nian geok do, ai gabe sai mengkel ma hami.

Dua ari na salpu, rap mulak ma hami sain parkarejoan, somal do songoni, ai mardomu pajonok do. Rambon-rambon ari ma hatihai, alai dang pola golap dope. Hu pa so ma odong-odong on dijolo ni jabu i, dingkan alaman hi hombarjabu. Ninna roha asa unang manungkoti lao maniram suansuanani.

“Ai boasa dang pamasukonmu, pa?” ninna, mandok paenophon mobil on tu bagasan, asa unang manungkoti hombar jabu.
“Dison ma jo satongkin, papa mau nyiram, bukain dulu” nikku mangalusi. Bukain, ningku mandok pintu ni jabui.
“Ye,..siapa yang mau disini, dirumah aja”
“Di rumah aja?”
“Iya lah, mau nyiram kan?” nina muse mangulakkon hatangki, hut mengkel.

Tompu ma au gogo mengkel, jala dohot NaiPartogi mengkel.

“Neng….neng, pikiranya keman sih?, papa mau nyiram tanaman, lihat tuh, dah layu, seminggu tak hujan” nikku hut sai mengkel.
“Emang mama pikir mau NYIRAM itu?” ningku hut hudopi, dang maradi engkel nami.

Ai hata “Menyiram” on, sian tipi do dapot hami on, hatiha rap manonton hami nadua, songon naung husuhuthon diginjang. Ido diingot boru ni rajaon huroa. Didok nadi tipi i, molo mangarahon inanta i Marulaon na Hohom, manang mar THT ( Tarik Hariar Tombom) dihusiphon ma nanget. “Mah, nyiram yuk” ninna asa unang diantusi anakkonna. Ai kode rahasia do i, jala bahasa intelijen do i.