Goar

Ni ingot najolo, molo didok  dongan goar sidanak ni natua-tua niba, songoni nama leana nihilala. Marrara bohi, mohop pinggol, sai naeng pinokkik dongan i. Ai manang aha pe namasa, anggo na manggoari goar ni natua-tua i, ikkon do roroon. Masa pe taho bada, marsiranggut, marbokkol ulu, marsalaon hulikkuling, marmudar baba, alai anggo goar ni natua-tua i tung naso jadi dohonon ni dongan. Ai songon na madabu do arga diri niba holan diboto dongan goar ni amang niba. Jala dang jolma be niahap molo dohot do goar ni inong niba dipaehet-ehet dongan.

Partaluan do anggo anak ni guru–lumobi goar ni guru kapala, ala sai sude do umbotosa goar ni amongna. Songoni nang anak ni kappung, anak ni sittua, ai olo do disurat-surat niba adong goar nasida. Tor naeng tangis ma iba molo adong manjouhon, goar na sarupa alai dang sarupa, attar gogo dijouhon.

Sahat tu saonari, tung mansai bakkol do roha lao mandok goar ni inong niba, ai poda ni natua-tua mandok, dang boi dohonon goar sidanak ni amang nang inang niba, ai olo malala baba. Dibuat akka doli-doli ma batu nametmet dua biji. Dijou ma iba dohot dongan satorbang niba na topet marmeam disi.

“Nion, bapak mu” ninna huhut di tudu sada batu, dipeakkon di tano.
“Dungi nion ma bapakmu” ninna muse huhut manudu batu na asing.
“Molo na jago do ho, dege manang na danggurhon ma bapak ni si anu on” ninna doli-doli napaduahon i.
Ro ma dongan on, dibuat ma batu on, huhut didege-dege, ia so i ditijuri. Ai diboto jala dianggar ibana taralosa iba.
Didok doli-doli i ma muse, “Dage…dage, ditijuri bapakmu, nei..didege-dege, anggo au songoni ninga hutopar”
Ai molo nietong taralo niba do dongan on, pinomat adong paraloan, tor nitejjuhon do attong dah. Alai molo so taralo do kinira nidokma “dang bapakku i, batu do i ningon ma”.

Dang mate akkal doli-doli on. Didok ma tu dongan on, “molo na beteng do ho, tijuri ma pinggol na i”. Songoni do nang dongan on. Molo dietong ibana do, attar boi do taralosa iba, tor hatop do dibaen tijur otik tu ujung ni jari-jari na i, dungi didaishon ma tu pinggo niba. Anggo i pe dah, masa ma parsoranggutan.

“Baen salam” ningon ma attong, huhut pinohul tangan on
“Ho parjolo” ninna alo on
“Ho ma parjolo” ningon muse, huhut dimulai mossak on.

Alai olo do tuk suda ari, sappe golap, dang jadi maetejju.

Dinasadari, disikkola minggu. Marminggu ma si Josep anak ni Sittua Marbun dohot donganna. Dungi disukkun guru sikkola minggu on ma nian nasida. “Ise mamboto goar ni bapak ni si Josep”. Sip do sude. Huroa dang adong mamboto nanggo sada. Jala, haru si Josep sandiri dang diboto.

Ro ma sahalak sian pudi mandok “Huboto do, Sittua H Marbun” ninna. Mekkel guru sikkola minggu i. “Daong i, ise muse mangalusi ninna”. Sip sude

“Ingot be on, ia goar ni bapak ni si Josep ima si Jakkop” ninna guru sikkola minggu on huhut di pasidung parmingguan i.

So gok dope satonga jom dung sidung sikkola minggu. Habegean ma guttur diluar. Marsuraki dakdanak i. Hape nunga marsiranggut jala nungnga marsijanggolaan si Josep dohot si Humuttal. Nga margulu-gulu gabbo nasida nadua. Dungi ditolai guru sikkola minggu on ma nasida.

“Boasa marbadai hamu”. Sip. Dang maralus.
“Boasa marbadai hamu, alusi, molo dang dialusi ikkon hupaboa tu gurumuna asa dipahaluar hamu sian parsikkolaan” ninna guru sikkola minggu on muse.
“Digoar-goari bapakku” ninna si Josep
“Dang tahe, sahali do, ipe nanget do hudok” ninna si Humuttal, mangalusi nang pe so disukkun
“Boasa goar-goaranmu bapakni si Josep on, tokka songoni, dang sigoaran goar ni natuatua” ninna guruon
“Dang holan au, dohot do na asing” ninna siHumuttal, huhut dipaddok sada-sada ise donganna na na manggoari i
“Sian dia diboto ho goar ni bapak ni si Josep” ninna guruon muse manukkun.
“Ai guru i do paboahon”
“Ise huroa goarni bapak ni si Josep, dok ma”
Sip. Dang maralus, huhut marsiberengan nasida nadua. Alai anggo tangan ni si Josep nunga pohul!. Haru digoari muse, ikkon hona lopeng.
“Husiphon ma, nanget dok” ninna guru on huhut dipadonok pinggolna.
“Si Jakkop, guru”.