Get Gifs at CodemySpace.com

Tulang Paranduhur


Marragam do hagiot ni jolma di portibi on. Adong do na lomo rohana makkail, lao do on manang na tudia asal ma diboto adong pakkailan na une. Adong muse na giot maredde. Tikkos manang naso tikkos ende, not na suarana, alai ala giot  ni roha sai di jugulhon. Anggo amanJamordong asing do hagiotna, ima maranduhur. Tarbarita do bayon tu desa na ualu ima paranduhur. Sude do luat diardapi ibana holan lao maranduhur. Boi do bayon manggogop sadari manipat dang humusor di rabbai holan alani anduhur. Boi dipasuman sappulupitu masam suara ni anduhur. So mangan manang so mangula pe taho  holan alani pabege-bege soaran ni anduhur. Ai gok anduhur sijabuna.
Disada tikki, mangoli ma berena. Ibana ma sijalo tintin marakkup. Dua minggu andorang somata ni ulaon, nga mangarade ibana. Dijou dongan tubuna, asa ria uduran nasida horong ni tulang. Dituhor ulos na uli sigajjang rabbu jala diparade dekke siboanon tu pesta i. Diboto ibana, ikkon ibana do innon pasahat ulos, ima ulos ni Tulang.  Akkup ni i, di apil-apil ibana uppasana. Disukkun akka hobbar jabuna, ai aha do uppasa nasomal sian tulang.
“Uppasa sitolu-tulo ima baen lae, nasomal ima, dang pola ikkon godang hata uppasa, ai so i na rumikkot, hata pasu-pasu, hata gabe-gabe tu bere i do” ninna amaniBasiha, donganna saparmeaman-saparkatuan. Ai hatiha mar jokker karo do ibana manukkun amaniBasiha.
“Eme sitabba tua, parlinggoman ni siborok…” ninna ibana, dipahulahulakkon hata uppasa on, asa  unang sala. Dungi sada nai muse, molo tu ibotona innon dohononna ma “Addor hadukka”.  Ido na somal didokkon halak. Ia so si molo tu bere na i annon uppasa “pinattikkon hujur di topi ni tapian…”, bohama akka uppasa gabe-gabe, asa gabe sude parniulaan ni tangan ni berenai, dituppak amanta namartua Debata.
Dungi uppasa panutup hira hira “Sahat-sahat ni solu…”. Geok do sipata. So ditanda jolma be solu, addor hadukka songon dia rumangna, si borok boha rupana, Hujur pakkeon tudia, alai sai dipaddok di uppasa.
Songoni do huroa rumang ni ulaon ni halak batak on. Parjolo ro tulang jala ikkon disi, alai ikkon  nasida uppudi mulak, manipat satonga ari holan na mamereng-mereng  ulaon ido nasida. Ima bagian ni tulang, molo di pesta adat batak. Andorang so marsipanganon dijouhon ma asa ro horong ni tulang tu bagas. Dungi ditomu-tomu hasuhuton ma uduran ni tulang on marhite tortor nang uning-uningan. Alai, olo ikkon jam lima potang ari pe asa tu horong ni tulang ulaon, ima ulaon mangulosi.
Tep ma dah!. Dung sidung rupani di tomu-tomu hasuhuton bolon uduran ni hula-hulana be diuduti ma makkatai, dungi marsipanganon ma.
Sipata, geok do pakkilalaan. Ro ma nian pande hata on, didok ma “Nga rade hamu rajanami, raja ni hulahula nami” asa mulaan namai nama pakkataion on dohot raja ni pamoruon nami” ninna parsinabul ni paranak. Huhut dijouhon ma sada-sada horong ni hula-hula na roi. “Dipudi hamu rajanami sipaimaon, dijolo sieahan, alani i tutur-tuturi hamu hami pamoruon muna di ulaon on, alai..” Oma na geok i “Alai, holan panuturion ma sian hamu”. Boasa pola nian adong hata alai?. Ai da sude do nadisi i siboto parhundul na be?. So pola didok pe hata alai, nga diboto uduran ni hula-hula i aha siulaonna. Ima di huta na ribur on raja parsinabul makkatai.
Somal do rupani di isappon akka parisap ma sigaretna nanggo pala sapangisapan. Mijur ma tu duru amanJamordong, mardomu ma alani mohop ni ari, hodohan muse. Dipahundul ibana ma di batang ni hau di alaman i, dungi dibukka jasna. Ia jas on, sangajo do dipatompohon. Ai holan alani ulaon on pamasu-masuon ni berena, si Pereddi do.
Naso panagamanna, adong ma manetek tu simanjujungna. Hape napu manang kotoran ni pidong. Anduhur. Dinoto ibana do attong, napu ni aha na hona tu simanjujungna i. Bah!, Anduhur do tutu, dang sala be sian uap ni napu na  on. Ninna ibana huhut dianggo. Sahit bolon ni amanJaomordong ima maranduhur.
Dipanotnoti ibana ma doppak gijjang, didia hasonggopan ni anduhur on. Makkuling muse ma anduhur on. Longan situtu ibana mambege haulion soara ni anduhur on, mansai tabo. “Anduhur nise do naeng on” ninna ibana.  Dang sadia leleng habang ma anduhur on tu hau na asing, na jonok tusi. Didapothon amanJamordong tu parsonggopan ni anduhur on. “Leleng nai tikki asa mangulosi” ninna ibana uhut di bereng jom na.
Songonima torus, nga opat hali habang anduhur on. Alani ni kojina rupani namaranduhur, di ihuthon amanJamordong.
Ra, ido alana asa adong hata na mandok “Lomuk-lomuk darapati” ninna,–dongan sabutuha ni darapati do anduhur–, toho do i. Ia naeng di takkup ibana, dang olo, habang tu hau na asing, alai dang dao. Dungi dijonohi muse, habang tu hau na sada. “Ikkon hutakkup” ninna amanJamordong dibagas rohana. Ganup songgop anduhur on, dijakkit ibana hau i, dungi, dukkon di gijjang diullushon ibana tanganna pasuman-suman soara ni anduhur, asa so anduhur i. Dijururhon tanganna muse, habang anduhur itu hau nasadan nai.
Dang diboto ibana nga tung dao habang anduhur on sian inganan parpestaan i. Jala nga botari, lalap alani anduhur on.
Dipudina, galaput horong ni tulang.  Sude dior-dior, dang di ida amanJaholong–dongan tubu na, ima apala tinodohonna sian amangudana- dang disi be amanJamordong. Sukkun-sukkun nasida, atik adong mamereng. Dipaima dang marnamullop. Adong ma mandok, di ida ninna mangalele anduhur. Nga suda halak!.
Dung jam lima, dapot ma partikkian mangulosi nama tulang ni pangoli. Anggo naiJamorodong pe nga marhaliotong mangalului tu duruan. “Lioat i, sumalim i, sai holan anduhuri, sai holan anduhur i. Pailahon, ikkon huputas pidong nai di jabu” ninna marbete-bete.
Disuarahon parsinabul ma asa mangarade tulang lao mangulosi. Hehe ma amanJaholong diboan uduranna. Huroa, ala na poso dope ibana, jala hurang diantusi na mandok hata, ba, bolak-bolak bohina. Marsituganan ma ibana dohot piga-piga halak dongan tubuna na asing.”Ho ma mandok hata, bah appara, ai dang niattusan ulaon songon on” ninna ibana huhut naeng mijur tu pudi.
“Dia do muse, anggo adong dope ho abang, datung tor tu hami dah, na mangihuthon hamuna do hami, paribur-ribuhon” ninna amaniJapadot, tong paula-ula misir nanget tu pudi.
“Ido, pas do i amanguda, ikkon ho dope na tumikkos” ninna sahalak nai huhut diittopi sigaretna, huhut dipareade ulos si ulossononna.
“Huhusippon pe nanget-nanget sian pudi annon, huajari pe ho maruppasa, dipudim pe au” ninna amanTogu.
Ujungna, disukka-sukka amanJaholong ma na mandok hata on. Tep ma mandokhata.
“Imadah tutu ito, dohot ho laekku, marlas ni roha hita sadarion di ari pamasu-masuon ni bere nami si Pereddi, sai hatop gabe ma bere on, maranak sappulu pitu marboru sappulu onom, dongan muna muse saur matua. Songon hata ni uppasa ma tutu ito, lae, –addor hadukka ma ninna togu-togu ni lobbu, peppeng matua hamu manogu-nogu lobbu” ninna ibana, huhut diapusi hodokna. Martitir. Mekkel halak umbegesa.
“Nga sala i uppasa mi abang, manogu-nogu pahoppu do” ninna amaniJapadot marhusip. Humalaput ma ibana patikkoshon. Alai anggo jolma bolak nga mekkel.
Diuduti ibana muse mandok hata i. Saonari tu berena si Perddi nama.
“Nian, dang au hian mandok hata bere, tulang mu amanJamordong do, alai ala dang dison tulangmu gabe au ma,  sarupa na dos do hami. Oppe dah  tu ho bere, nang borukku, sai ripe na gabe hamu dipasu-pasu Tuhanta. Sai dapotan parsaulian hamuna ateh. Naparpudi sahalai, hata ni uppasa –turtur ma ninna anduhur, tio ma ninna lote, nga lao tulangmu amanJamordong maranduhur, disi nami appe sore-, songoni ma” ninna ibana, huhut diuloshon hatop ulos ni tulang i. Dang nanggo adong hata ni ulos i. Tippas!! alani anduhur.

Silahkan Tinggalkan Komentar Anda

Template by:

Free Blog Templates