Manggun nasa bitis, mambal nasa botohon. Hata ni turiturian pagodanggodang dohonon. Ia adong ma najolo sada halak napogos, posuk parngoluonna. Ama ni Porsan do dijou halak ibana. Dang adong tano mahiang sirimbaonna, dang adong tano maraek sitinggalaonna. Manggadis gogo ma sipata ulaonna rap dohot ripena.
Manirat ulos ma sipata ulaon ni pardijabuna i molo dung golap ari, ia ibana sipata ma maragat ia tung adong mangalehon bagotna agatanna. Dituati do rura didalani ramba mangeahi angka bona ni bagot na naeng siagatanna i.
Disada tingki hundul ma ibana di pantil ni hutana i huhut manatap dompak habinsaran, Marsak do idaon bohina.
Nunga tolu hali Ompu Bornok ro manungguli ibana asa haru digarar nian utangna naung sataon dijalo. Toho, na di taon nasalpu marsahit ripena i. Lola do nasida mangula ulaonna jala suda do sipeopan nasida laho tu parubaton. Laho mangudut ngolu ni nasida do umbahen tung marsali ibana tu Ompu Bornok 50 kaleng eme. “Palupalu ni gordang di toru ni hariara, ia tung sunuan nian utang, ia adong nian tarida”, ninna rohana huhut bubuason.
Dilangkahon ma patna tu robean mangeahi pangko naung leleng nibalbal na i. Nunga sataon ne dang hea ro tuak ni pangko sibalbalonna i. Alai sai tubu do pangkirimonna marpangulahi pangko i martuak, anggiat nian boi digarar utangna tu Ompu Bornok. “Tuak na tonggi, bagot sibalbalon. Ia tung paet pe naung dung i, tonggi ma tu joloan on”.
Ditampul ibana ma meang i bagot i, jala dirahuti dohot rongkap pangendat anggiat sogot manetek tuakna. Alai gotap do pangkirimanna dung disigat muse panampulanna i balik arina. Dang manetek, jala mahiang sambing. Manetek ma iluna, gotap pangkirimonna. “Ai dia do ale ompung, namasa tu baoadi. Urat ni langgugun ma i da, tu urat ni baja. Tung hinalungun maon na so adong tudosanna”, ninna rohana huhut tumatangis.
Mijur ma ibana sian ginjang, mansai tae ai huhut do marabur iluna. Dung sahat ibana ro di toru, mangumpellet ma ibana diatas ni tano jonok bona ni bagot i. Sai tumatangis ma ibana disi ala ni arsakna na so adong panetek ni tuak niagatanna i. Alai tompu ma ibana tarjolma ala adong dibege ibana soara manise.
“Ai boasa sai tangis ho disi ale baoa paragat…?”
Dituluthon ma sian dia haroro ni soara i, alai dang adong jolma dibereng. Dilangkahon ma tu balik ni bona ni bagot i, alai tong dang adong diida jolma. Ujungna manggora ma ibana. “Ai ise do hamu, jala didia hamu?”, ninna huhut sai diranapi humaliang.
“Ai dilambungmu do au, alai si bilolangon ho humaliang”, ninna soara i ma muse.
Alai tong do dang dapot diida ibana namangalusi sungkun-sungkunna i, dipatangkas ma. “Ise do hamu ale namangangkupi au mangkatai?”
“Najongjong dijolom on do au, ia goarhu si Boru Sandebona do”
Tarsonggot ma Ama ni Porsan, ai bagot i do hape donganna mangkatai. Dipatandahon ma dirina; “Ianggo au da Boru Sandebona margoar Ama ni Porsan do sian Lumban Tandol”.
“Unang pola tarsonggot ho, ai nunga leleng ho hutanda saleleng sai ro ho mambalbali au jala manggotapi meanghu. Sai ngalutan do au salelengon dipanjangkiti ho, mangae sai dibalbali ho, hansitan sai digotapi ho. Alai dang olo be au tangis, ai dang adong panarihonmu saleleng on di hangalutonhi. Alai on dope ho hubereng tumatangis tarlungun-lungun padurus-durus ilu”, ninna si Boru Sandebona ma mangalusi Ama ni Porsan.
“Iale Boru Sandebona, sugari huboto na adong arsakmu ala ni pambahenanhi nasailaon, atik masipalilungan do hita. Alai nunga saep roham dihangalutonmi, au ma nuaeng na sai marsak jala ngalutan di ngolu on, ai tu hamagoan nama au”, ninna Ama ni Porsan ma mangalusi.
“Ai tung aha ma arsakmu, tudosan ni arsakhu. Boi dope ho lao pauba-uba langka, ianggo au sai hot do dison. Guru di ho do na salelengon mansuasaehon au, dung i mulak ho tu bagasmu manuhuk hudon parisian ni ilungku na sai tumatangis i. Alai nunga marjanji au dang tumatangis be ala ni pambahenanmu. Alai tahe ala ni aha umbahen sai marsak ho jala aha sitaononmu nadumokdok sian sitaononhu?”
Ala na sai disungguli si Boru Sandebona sidangolonna, tangis ma ibana huhut ma mangandung.
“Nunga gok hinalungun au da Boru Sandebona na so haputihan songon na seang i, na so habajubajuan songon lapung i. Songon tandiang nahapuloan na soada palilunghon i, siala ni utang taguhan so hagararan i.
Rungka mai ale Boru Sandebona dipangarohaingki, pandohan ni bagian na so hadadapan i. Pinatoru ni sibaran na so martudosan i. So ada jamaon ni tangan tu tonga ni galungan, anggiat taruli sibonggaron tu parbodarian i.
Nunga ditodos siaginon au da Boru Sandebona tu najojak tandol i, na so boi tarnenep dirindang ni sibalunon i. Mampar do simangarudok na so marpaiogon i, boha ma pandungdunghu na soada gala i, boha ma pangallunghu di na so haabaraanhi. Ponjot so nabolon do au, sungkot so naginjang i, tudia pe so tampil, tuaha pe so bolas, hinaluhaluan ni hapogoson na soada tudosan di sulubalang ari namangilas i.
Dang haputihan hinalungun da Boru Sandebona songon naseang i, nabagas so tardodo song alup ni silumanlan i. Dang hasaeman sidangolon songon begu na laos i, dohot siak ni bagi na ampe di abarangki.
Nunga songon jarohak nataruntul au da Boru Sandebona, songon ansuan na tarbatu i. Najagar tindang do au songon pangunggasan, na jagar hundul songon panghulhulan i. Naborat so hallungon ma au, na dokdok so jujungon i, na nididang madabu di tonga ni namailibulungi…….”
Dipaso Ama ni Porsan ma na mangandung i ala adong manetek songon mual tu dagingna. Didadap ma abarana hatetehan ni mual i, alai dianggo ma song na uap ni arirang. Dialathon ibana ma dompak ginjang, nunga manetehi tuak sian meang panampulanna i.
