ADAT NA GOK DOHOT GOK NI ADAT

Adat-na-gok-dohot-gok-ni-adat

Molo pinaidaida namasa di angka ulaon adat nuaeng on, lumobi di ulaon unjuk (anak mangoli manang boru muli) nunga tutu lam maol ulahonon ni nahurang sinadongan.
Nunga tangkas masioloan tu ragi ni sinamot, unduk masioloan rambu-pinungu (sitombol) sipasahaton ni paranak, alai panandaon sahat tu tulang ni tulang nang so dohot mangadopi ulaon. Suda tingki jala ngongolngolan na adop di ulaon i. Gabe didok nadeba ma ndang tarula adat batak.

Di adat namasa sinuaeng on nunga gabe gumodang napinangpangkon sian na nilompa, lapatanna gumodang uram-urang sian impolana.

Poda ni sijolotubu mandok, tektek mula ni gondang serser mula ni tortor, sise mula ni hata, sungkum mula ni uhum. Napinodahon asa poda, napinollunghon asa pollung. Sian nametmet do siulaon asa tu naumbalga. Dang hea dope patupa namarmiak-miak hape pintor patupa gaja toba (horbo).

Asa hot di ruhut ni adat jolo sian toru do asa tu ginjang. Dang dohonon naung sarjana ianggo so hea dope singkola dasar. Alai ala songgot adong sinadonganna, gabe pintor dibahen ma lomona gabe hurang banggua ni siulaonna.

Maringkatingkat na dijolo mangihut ihut ma nadipudi. Ala adong namora marsiulaon, dihalang gordang bolon, dibahen parjuhut horbo sitingko tanduk, dohot ma na hurang sinadongan mangihut-ihut. Gabe tenga-tenga ma siulaon i. Dihatahon ma manggarar adat nag ok, hape sinamot diunduk sitombol.

Molo sinungkun angka natuatua dang adong hata na mandok “adat na gok”. Manjalo adat dohot manggarar adat do dihatahon. Subang do dohonon tu hulahula manggarar adat na gok, ai dang adong suhat-suhat mambahen nadenggan tu hulahula.
Di angka na hurang sinadongan dihatahon do, on ma rajanami natarpatupa hami gok ni adatnami tu hamu.

Tung boha pe morana, tong do somba ni adat dihatahon. Ai molo dihatahon adat na gok, olo ma paidua ni suhut mangido na so tarpatupa paranak.
Di pangantusion ni halak batak nuaeng nunga hurang mangguruhon ruhut ni hata. Holan umpama dohot umpasa na marganjang-ganjang nama diguruhon.

Dipodahon natuatua do; unang niihuthon gaja marhonong, unang niihuthon hora (bodat) manjangkit. Olat ni natarbahen do bahenon. Molo balga binangana balga ma dengkena. Songon i do gok ni adat didok natuatua.